ក្រសួងការបរទេស រៀបចំជាប្រព័ន្ធទូរស័ព្ទ សំរាប់មាតាបិតាអាណាព្យាបាលនិស្សិតដែលកំពុងស្នាក់អាស្រ័យនៅប្រទេសចិន
04-February-2020 | ដោយ ពលមនសិការ
ភ្នំពេញ៖ កាលពីថ្ងៃទី៣ ខែកុម្ភៈ ឆ្នាំ២០២០ ក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា ពាក់ព័ន្ធនឹងសភាពការណ៍វិវឌ្ឍនៃជំងឺឆ្លងផ្លូវដង្ហើមកូរ៉ូណា នៅសាធារណរដ្ឋប្រជាមានិតចិន ក្រសួងការបរទេស និងសហប្រតិបត្តិការអន្តរជាតិ សូមជម្រាបជូនសាធារណជន មេត្តាជ្រាបដូចខាងក្រោម៖
• កន្លងមក រាជរដ្ឋាភិបាលកម្ពុជាបានតាមដានដោយយកចិត្តទុកដាក់ខ្ពស់បំផុត ចំពោះស្ថានការណ៍វិវត្តនៃការរាលដាលជំងឺឆ្លងផ្លូវដង្ហើមកូរ៉ូណានេះ។ ក្រសួងការបរទេស និងសហប្រតិបត្តិការ អន្តរជាតិ និងបណ្តាស្ថានតំណាងរបស់កម្ពុជា នៅសាធារណរដ្ឋប្រជាមានិតចិន បានទាក់ទងយ៉ាងជិតស្និទ្ធជាមួយអាជ្ញាធរ និងក្រសួងការបរទេសចិន ដើម្បីតាមដានបច្ចុប្បន្នភាពនៃសុខុមាលភាពរបស់ពលរដ្ឋខ្មែរ ជាពិសេសនិស្សិតខ្មែរដែលកំពុងសិក្សានៅសាធារណរដ្ឋប្រជាមានិតចិន។
• ទន្ទឹមនឹងការផ្តល់ទំនុកចិត្តលើចំណាត់ការប្រកបដោយការទទួលខុសត្រូវរបស់អាជ្ញាធរចិន ក្រសួងការបរទេស និងសហប្រតិបត្តិការអន្តរជាតិ បានណែនាំឱ្យស្ថានតំណាងព្រះរាជាណា-ចក្រកម្ពុជា ប្រចាំសាធារណរដ្ឋប្រជាមានិតចិន ទាក់ទងជាប្រចាំជាមួយនឹងអាជ្ញាធរពាក់ព័ន្ធរបស់ចិន ដើម្បីផ្ញើជូននិស្សិតខ្មែរនូវគ្រឿងបរិក្ខារអនាម័យចាំបាច់នានា។ ក្រសួងការបរទេស និងសហប្រតិបត្តិការអន្តរជាតិ ក៏បានទទួលការបញ្ជាក់ប្រកបដោយភាពកក់ក្តៅថា សាកលវិទ្យាល័យចិនបានឧបត្ថម្ភស្បៀងនិងសម្ភារៈចាំបាច់នានាដល់និស្សិត ហើយបានសំណូមពរអោយអនុវត្ត និងគោរពតាមវិធានការបង្ការ និងទប់ស្កាត់ដែលអាជ្ញាធរចិនបានដាក់ចេញ ដើម្បីធានានូវសុវត្ថិភាព និងសុខភាពផ្ទាល់ខ្លួនផង និងសាធារណៈផង។
• មកដល់បច្ចុប្បន្ននេះ ពុំមានករណីឆ្លងមេរោគនេះលើពលរដ្ឋខ្មែរទេ។
• ក្នុងស្មារតីយកចិត្តទុកដាក់ជួយឧបត្ថម្ភ និងតាមដានសុខុមាលភាពរបស់ពលរដ្ឋយើង ជាពិសេសនិស្សិតខ្មែរដែលកំពុងស្នាក់នៅ និងសិក្សានៅប្រទេសចិន ក្រសួងការបរទេសនិងសហប្រតិបត្តិការអន្តរជាតិ និងស្ថានតំណាងកម្ពុជា នៅសាធារណរដ្ឋប្រជាមានិតចិន បានបង្កើតបណ្តាញ WeChat ជាមួយនិស្សិតខ្មែរនៅតាមតំបន់នានា នៅប្រទេសចិន ដើម្បីសំរួលដល់ទំនាក់ទំនង និងការផ្តល់ព័ត៌មានបានទាន់ពេលវេលា។
ទន្ទឹមនឹងនេះ ក្រសួងការបរទេសនិងសហប្រតិបត្តិការអន្តរជាតិក៏បានរៀបចំជាប្រព័ន្ធទូរស័ព្ទសំរាប់មាតាបិតាអាណាព្យាបាលនិស្សិតដែលកំពុងស្នាក់អាស្រ័យនៅប្រទេសចិន ដែលចង់បានព័ត៌មានបន្ថែមឬមានចំងល់ទាក់ទងនឹងសុវត្ថិភាព និងសុខភាពនិស្សិត តាមលេខទំនាក់ទំនង ដូចខាងក្រោម៖
- លោក ជ័យ រដ្ឋា 077 575 807
- លោក យស សុខេមរិន 012 445 959
- លោក ហន ឧសភា 089 216 599 ៕
ចំនួនអ្នកទស្សនា
- ថ្ងៃនេះ4121
- ម្សិលមិញ15681
- សប្តាហ៍នេះ62961
- ខែនេះ84841
- ឆ្នាំនេះ84841
- សរុប20527297